Madagascar

Tongasoa ao amin'ny fanjakany i Baroa...

( Novaiko ilay sary fa mahakamo be hono hihihii. Ity sexy tsara ary eee)

Tsy nahatana ny toky nifanomezany tamin’ireo nifidy azy ny filoha Ravalomanana. Tsy niodina araka izay tokony ho izy ny firenena ary fahotana niaraha-nanao izany. Betsaka ny zavatra tsy nety, tsy azo ekena, tsy azo leferina.

Kanefa…

• Izao ve no « fahafahana » nokatsahana ?
• Izao ve no « fahalalahana » ?
• Tadiavina amin’ny jadona ve ny demokrasia ?
• Fitondran’olom-bitsy ve no nitolomana ?
• Tena olona azo hitokisana ve i Andry Rajoelina ?  ( Mba eritrereto tsara ny valin’io fanontaniana io, azafady, ary aza sodoka amin’ny hoe « olo-manga » e, « mahery fo »e, fa izany ihany no nahavoa fito taona lasa izay. Ny adalàna mantsy toy ny hasoavana, zarain’ny natiora samy hanana ny anjarany. )

Kanefa koa…

• Lazaina hatrany fa tokony hevitra no fidiana, fa tsy olona. Fidio ny hevitra izay eken’ny saina fa  jereo hatrany anefa ny olona manoloana. Iza izy ? Inona no lalana nodiaviny ? Iza no akaiky azy ? Iza no manolo-tsaina azy ? Fa maninona no izy ? Fa maninona no io no heviny ? Aza jerena an-jambany fa ny adalàna mantsy toy ny hasoavana..etsetra etsetra…
• Aza heverina ho toy ny mesia, mpamonjy sy mpanafaka izay rehetra tonga fa tsy misy izany. Tsy lahasan’andriamanitra kely, na olo-masina ny manompo tanindrazana fa fiezahan’ny olom-pirenena, izaho, ianao, isika. Tadidio izany ary hevero isan’andro fa mora loatra ny miampanga kanefa ny hadisoana dia niaraha-nanao. Ny adalàna mantsy…etsetra etsetra…
• Ny vahoaka no tompon’ny fahefana izay omeny amin’ny alalan’ny latsa-bato fa tsy rombahin’ny lalana (* atsy ambany jereo).Izay olona azonao itokisana sy manan-kevitra matotra no fidio, ary harovy ny safidinao, fantaro izay inoanao ho marina sy mendrika ary isan’andro dia izany no ataovy laharam-pahamehana. Mba tsy hisy olona avy atsy na avy ery hamory vahoaka ka hilaza tena fa "mpitondra ny teninao".

Kanefa ihany…

• Aza variana mihaino habobo sy izay « lainga masina » rehetra. Mora ny mikabary sy manao be am-bava. Tsy misy mora ohatran’ny miteny hoe « Tonga ny fahafahana, tonga ny fanavaozana », ary isao ange hoe impiry tao anatin’ny 40 taona no henonao izany ??? Fa sokafy tsara ny maso dia jereo tsara izay tokony ho jerena. Tsy mifankaiza amin’ny firenena mahantra aty Afrika i Madagasikara : resa-bola no ao ambadiky ny adim-pahefana ao aminy. ( Aza mody kiriko eo ranona a, fa izao ve vao tsapanareo koa izany a ! )
• Tsy ny androany ihany no tena ilana famahana olana. Ny amin’ny ampitso koa, ny amin’ny afaka dimy, folo, roapolo taona koa. Ny marina tsy azo hiodivirana dia mahantra mpitarika i Madagasikara, sarotra hitokisana ny mpanao politika malagasy, mangina ( tsy fidiny ?) na tsy henoina ny avara-pianarana, tsy manao ny asany izay tokony hanao izany, anjorom-bala hatrany ny fiaraha-monim-pirenena ary ambany loatra ny tahan’ny fahavitam-pianarana hany ka ambany dia ambany koa ny ady hevitra ( Aza mihivingivim-paty eo ranona a, fa tsy ‘nareo ve no henoko nihantsihantsy olona ohatran’ny adala a ! Sa ve hoe "famosahan-kevitra"?)
• Hanontany anao, hanontany ahy ny Tantara, ka sao indray hilaza hoe « Tsy izaho fa ianona, tsy izaho fa ianona ». Misafidy : na miasa na matory. Fa tsy matory aman-taonany dia avy eo mody hoe « Efa tenenina foana fa eee ». Taiza izay niteny teo, fa mpiray tsikombakomba daholo ? Ntsss !

Kanefa hatrany…

• Halako re ny fanangaroana tsy am-piheverana ny politika sy ny resa-pivavahana a. Na tamin’ny 2002, na izay nitranga androany dia samy mahatsiravina ahy. Asio mpiandry, asio fanalana devoly e… Ka raha mba asiana ati-doha naninona ?
• Ry dada sy neny, aza avela hanao be di-doha ohatran’i Mialy s’en fout ny zanakao. Tereo hifoha haingana ny olom-banona ao aminy, mba tsy ho fikana jiolahim-boto mirefarefa amin’ny tany toy izao foana no hiveloman’ity firenena ity.

• Manana hadisoam-bevava koa ny mpampiely vaovao. Ilaina, raha izaho no miteny, ny fisian'ny "journalisme engagé". Fa tsy hitako teto izany tao anatin'ny roa volana. Tsy malahelo aho, tsy tezitra akory. Satria fantatro koa fa ny adalàna toy ny hasoavana...etsetra..etsetra...Fa diso aho, diso tanteraka, tsy manana fialan-tsiny na iray aza satria matoa ireny no mitranga dia satria tsy nandray izay tandrifiko aho, sy izay rehetra tokony nanao izany.  Ny adalàna, toy ny hasoavana...etsetra..etsetra..

* : Misy zava-dehibe tokony horesahana mikasika ny atao hoe "Fifidianana marina" eto amintsika, raha namaky an'i Père Sylvain Urfer ianareo. Fa, fa, fa, efa be loatra ny resa-be dia andro hafa manohy...Tiako tenenina hoe nisy hadisoana ( hadisoako, hadisoantsika) hatramin'ny 2002 nankaty ka tarazo enti-miaina izany. Fa, fa, fa, hoy aho..Leo be za dia amin'ny manaraka indray.

PS : Tout ce que je raconte est contestable. 'Za tsy mesia, tsy andriamanitra, tsy mitondra ny fahafahana.