'Zay tianareo ranona a!

« Maika sady manan-danja. Manan-danja fa tsy maika. Maika fa tsy manan-danja. Sady tsy maika, no tsy manan-danja ». Toy izany no fisokajian’ireo manana andraikitra sy mpifehy raharaha ny laharam-pahamehany. Fomba tsotra, mora atao ary mitondra vokany. Kanefa tsy voatery arahana foana. Ohatra fotsiny, ao anatin’ity tany malemin’ny krizy ity, dia tsy dia mampiraika firy izany fomba fisaina izany. Satria angamba, rehefa tojo toe-javatra toy izao, dia ny fieboeboana, ny fampandriana adrisa na koa ny tahotra ( izany ve ???) no ambony noho ny laharam-pahamehana rehetra.

Raha tsy tonga nanatrika ny fifampiresahana eo aminy sy Andry Rajoelina ny filoha Ravalomanana, izany ve tsy midika fa sady « tsy maika no tsy manan-danja » ho azy ny dinika ? Sa kosa tetikady politika avo lenta izay tsy ho tratry ny sainay olombelona ny azy ? Fa ny vokany aloha dia iray ihany : tapaka ny resaka, ary tsy ahitam-baliny ireo fanontaniana lehibe. Ntsss…

Sady mahavariana no mampieritreritra ( maha ratsy loha mantsy e) ny fikorosofahan’ny tantara. Rehefa nandia fitokonana tao anaty herinandro maro, rehefa nisedra herisetra sy vono olona tsy roa aman-tany, dia izao indray fa tojo olana goavana sy mampatahotra. Kanefa…mety misy angamba any ho any « olon-kafa » mahita rirany amin’izao toe-javatra izao ? Ahoana moa no inoako fa tsy hisy ao ambadika ao tombotsoa tena manokana ary tsy maintsy arovana ( tsy maintsy arovany) matoa mahasahy mifono lamba mena ? Mety tsy tokony hipetraka izany fanahiako izany, enga anie. Kanefa apetrako ihany satria raha ny fivadihan’ny tantara sy ny zava-dratsy niseho tao anatin’ny herinandro vitsivitsy, dia azoko antoka koa fa tsy dia misy intsony ny finiavana hanatsara zavatra…

Eny e, hilaza koa angamba ny mpiara-dalàna amin’ny filoha Ravalomanana fa tena nisy ny « antony tsy afa-nihoarana » ka nahatonga azy tsy hanatrika ny dinika. Ary enga anie ho azy ireo, raha mbola tiany koa ny hihazonany ny ambim-pitokisana hany sisa voatanany, ka tena goavam-be izany antony izany. Lehibe mihoatra lavitra noho ny hoavin’ny firenena, noho ny fandriampahalemana, noho ny fiahiana ny olona sy ny fananany, ary ambony noho ny haja aman-kasin’ny tanindrazana izay efa milaza ho mpandala fihavanana. Raha tsy izany dia fanaovana tsinontsinona sy bodongerina ihany izany.

Izahay moa ve, izahay mpanonofy, mpanantena volamena, tsy hino foana ihany fa mbola afa-mitsangana amin’ny alalan’ny hevitry ny olony ity firenenay ity. Izahay ve tsy mbola hino fa hisy ihany, indray andro any, fanjakana tsy voahozongozona fahatany Izahay koa ve tsy hino fa misy ny lalàna mifehy antsika rehetra na, maninona moa, misy ny fomba madio handaminana ny fifanorehana. Ary na dia izao aza, dia mbola tsy manan-ko lazaina ankoatran’ny antso ho an’ny fahatoniana sy ny fifanantonana izahay. Kanefa indrisy fa na dia izany fotsiny aza, dia toa tsy ho vita akory. Ka dia akory moa, fa …izay tianareo ranona a... ( leo sady Ssp koa za fa zay zany ;)))