Mitady ny tsy misy aho…

Tsy mitady olona manankarena aho, satria haiko ny mitady vola irery.
Tsy mitady olona hovadiana aho, satria tsy inoako akory
…ny hasin’ny fanambadiana.
Tsy mitady olona tsy mba mifoka sy tsy misotro aho,
satria ilaina koa ny mirevy indraindray.
Tsy mitady olona tsy mba miodina mihintsy aho : fantatro fa malemy ny nofo, indraindray. Ary soa ihany fa malemy ny nofo, satria raha ny toetra ratsiko irery dia tsy mba mendrika ny hitiavany ahy akory… (tsy manakivy aho fa haiko ihany ny lafiratsin’ny lohako)
Tsy mitady olona hampijaliana aho, satria ….
efa talentan’ny fiainana izany !
Tsy mitady anjely aho : izaho aza demony ! Olona hotiavina dia ampy, ary manam-po sy fotoana hitiavana ahy koa. Na tsy ny fiainana manontolo aza. Fa tsy iray segondra koa anefa.
Olona tsy mieritretitra ny hanataka, na dia tsy mba misy ho tatahana aza aty amiko. Izaho rahateo koa tsy hanataka, fa fomban’ny tsy manan-kambo izany.
Olona tsy vadin'ianona ary tsy hampirafy "loatra".
Ary raha hampirafy aza dia hitandrina foana izay tsy hanafintohina, satria efa tsy manakana azy tsy hiodina rahateo aho.
Izaho anefa tsy mampirafy, tsy hoe i Maria Virijiny na koa fanaperana fa…misy fetrany ny fasahiako.
Olona hisaina ny alaheloko rehefa hilaozany aho, ka hitady fomba mendrika sy mihaja mba handaozana ahy
( vonoiko itena raha manao fialan’ny jiosy)
Olona tsy hiteny hoe « ok, milay zany » raha holazaiko fa « tiako ».
Ary tsy hanery ahy hiteny hoe « tiako » koa vao hahatsapa izany... Olona mahaleo tena, salama saina. Nefa, aleo mivika kely ihany…  Mananko-lazaina, fa tsy be lazao koa anefa. Olona hiteny amiko ny tiany sy ny tsy tiany fa tsy hiaritra fahatany ohatran'ny tsy manan-katao. Olona mahazaka koa ny hilazako aminy ny tiako sy ny tsy tiako, kanefa hiezaka aho ny hilaza izany am-pahatoniana… Na dia milay kokoa aza ny filazako azy rehefa mandroatra ny foko.
Olona mahay mahandro sakafo, mba tsy ho faty noana izahay roa…
Olona mahalala-tsaina ka tsy ho tezitra na taitra raha manana fantasme aho, satria izaho olombelona.
Olona manana fantasme koa fa tsy vato aman-kazo.
Ary tsy ho menatra hilaza izany amiko. Ary tsy ho tafintohina koa raha hotanterahako izany. Na koa ho laviko.
Olona mahatoky sy afaka hitokiako ka tsy handany andro hifampitsikilo.

Tsy ianao anefa izany raha ratsy be ianao, na mahia kely, na fohy, na banga, na mitondra aretina, indrindra moa ka adala…
Tsy ianao koa izany raha tsy ampy fialamboly ianao, na tsy mahay mampihomehy mihintsy.
Tsy ianao koa raha tsy mahazo blague mihintsy ianao, na koa mahay ny hiran’i Céline Dion tsianjery, na manao slip kangourou…
Tsy ianao koa raha olona tsy manan-kilema ianao, nefa tsy mbola ianao ihany raha olona tsy misy kilema no andrasanao aty amiko.
Tsy ho tafa koa raha mahery setra na fiteny ( fa tafa be kosa anefa raha mahery setra sy fiteny rehefa…)
Na koa lasa adala amin’ny fivavahana…

Tsy ianao mihintsy koa raha ohatra ka avy mamaky an’ity taratasy ity ianao dia sahy hilaza fa « tena mety amiko izany»
Satria raha izany no marina dia mora kely ny manjono anao,
fa blibla dia tafa.
Nefa raha hilaza koa ianao fa " tsy mety amiko izany " na koa hoe "toa mampatahotra kle"…
Dia tsy mbola ianao ihany !
Efa omeko anao ambony vilia volamena ve izao tontolo izao sy ny foko, ary ny fahalalahana  sarobidy aminao ( He zany izy!!!) dia mbola sahinao ny hiteny amiko fa ... tsy mety ? Tena mba saro-tiavina...

Ary farany, tena tsy hahita rirany mihintsy ianao
raha tsy mahay mila vaniny ohatr’ahy. Mitady ny tsy misy aho ka mila  voatsihary. Fa mampaninona moa ny manantena? Ny hafa aza, hono, olona « mampaniry elatra » no ilainy… Jeune demoiselle ne recherche plus un mec mortel...

Mon coeur est un enfant de salaud. "Zaza alika" dirait Miss Jones.